🎯មនុស្ស ៣ ប្រភេទ អ្នកកុំរកស៊ីជាមួយដាច់ខាត

ការរកស៊ីសហការគ្នា ជាកម្លាំងពិសេសមួយដែលជួយឱ្យអាជីកម្មរបស់យើងអាចរីកចម្រើនទៅមុខបានលឿនរហ័សតាមរយៈទុន និងចំណេះជំនាញផ្សេងៗដែលយើងដាក់រួមបញ្ចូលគ្នា។ យ៉ាងណាមិញ នៅក្នុងការសហការរកស៊ីនេះ អ្នកត្រូវតែប្រយ័ត្នឱ្យបានដាច់ខាតជាមួយមនុស្ស ៣ ប្រភេទ ឬបើពុំនោះទេ អ្នកនឹងជួបគ្រោះធំដែលដោះស្រាយមិនបានជាប្រាកដ។ តើមនុស្ស ៣ ប្រភេទនោះមាននរណាខ្លះ? សូមបន្តអានទាំងអស់គ្នាដូចតទៅ។

១. មនុស្សដែលខ្វះចំណេះដឹង និងបទពិសោធលើអ្វីដែលខ្លួនចង់រកស៊ី

មនុស្សប្រភេទទី១ ដែលអ្នកមិនត្រូវសហការរកស៊ីជាមួយ គឺប្រភេទមនុស្សដែលខ្វះចំណេះដឹង និងបទពិសោធនៅក្នុងការរកស៊ីពាក់ព័ន្ធនឹងអាជីវកម្មដែលអ្នកចង់រកស៊ីរួមជាមួយគេ។ អ្នកអាចនឹងសួរថា “ចុះវាទៅមានបញ្ហាអី បើគាត់មិនចេះ តែខ្ញុំចេះដែរតើ?” បើអ្នកគិតបែបនេះ គឺអ្នកកំពុងតែដើរខុសផ្លូវហើយ។ ការរកស៊ីខ្វះចំណេះដឹងរបៀបនេះ អ្នកនឹងមានបញ្ហារកាំរកូសនៅពេលក្រោយ។ ជាពិសេស គឺការមិនទុកចិត្តគ្នា និងការយល់ឃើញខុសគ្នា។ ឧបមាថា អ្នកផ្ទាល់យល់ដឹងអំពីមុខជំនួញមួយហ្នឹង តែគាត់មិនយល់ ដូច្នេះនៅពេលអ្នកលើកឡើងនូវគំនិតថ្មី ឬប្លែកអ្វីមួយ គាត់នឹងកើតចិត្តសង្ស័យថា “វាគិតបែបនេះ វាច្បាស់ជាទទួលបានផលច្រើនជាងអញជាមិនខាន។” ម្យ៉ាងទៀត គាត់ពិបាកនឹងជឿទុកចិត្តថាគំនិតរបស់អ្នក គឺជាគំនិតត្រូវណាស់ ពីព្រោះគាត់គ្មានចំណេះដឹង ឬបទពិសោធដែលអាចឱ្យគាត់គិតយល់ដូចជាអ្នក។ ដូច្នេះ នៅទីបំផុត គាត់នឹងជំទាស់ការលើកឡើងរបស់អ្នក។ ក្នុងករណីជំទាស់ហើយ គាត់មានគំនិតថ្មីលើកឡើងមកវិញនោះ គឺមិនអីទេ តែបើជំទាស់ហើយចោលៗ នោះការងាររកស៊ីរបស់អ្នកច្បាស់ជាចប់សព្វគ្រប់ដោយគ្មានពាក្យវាចាជាមិនខាន។ អ្វីដែលអ្នកកាន់តែប្រយ័ត្ន និងចៀសវាងបំផុតនោះ គឺអ្នកក៏មិនចេះ ហើយអ្នកដែលចង់រកស៊ីជាមួយអ្នកក៏មិនចេះ។ បើនៅតែក្បាលរឹងដើរទៅមុខ នោះមិនខុសអីពីមនុស្សខ្វាក់ជិះសេះខ្វាក់កណ្តាលរាត្រីនោះឡើយ។ ដូច្នេះ មុននឹងសម្រេចចិត្តចាប់ដៃសហការជាមួយនរណាម្នាក់ អ្នកត្រូវតែច្បាស់ថាទាំងខ្លួនអ្នក និងរូបគេមានចំណេះជំនាញ និងបទពិសោធលើការរកស៊ីនោះ។ 

២. មនុស្សដែលគិតតែពីរឿងប្រាក់ចំណេញមួយមុខ

មែនហើយ បើរកស៊ីមិនគិតរឿងប្រាក់ចំណេញ តើឱ្យគិតរឿងអីវិញ? ពិតហើយថាការរកស៊ី គេច្បាស់ជាចង់បានប្រាក់ចំណេញ ប៉ុន្តែ អ្នកកុំរកស៊ីឱ្យសោះជាមួយមនុស្សដែលគិតតែពីប្រាក់ចំណេញ ដោយបោះចោលគុណធម៌ក្នុងទំនាក់ទំនងមិត្តភក្តិ បងប្អូន និងផលប៉ះពាល់ទៅដល់សង្គម។ មុននឹងទទួលយកនរណាម្នាក់ជាដៃគូរកស៊ី អ្នកចាំបាច់ត្រូវជជែកសួរនាំពីគោលបំណងពិតប្រាកដរបស់គេ។ ប្រសិនបើឃើញថា គេនិយាយផ្តោតលើតែប្រាក់ចំណេញខ្លាំងហួសហេតុពេក អ្នកត្រូវតែផ្អាកការសហការនោះសិន។ អ្នកខ្លះ ពេលចង់មានចង់បាន ក៏សុខចិត្តសហការជាមួយអ្នក តែនៅពេលដំណើរការអាជីកម្មមិនសមតាមអ្វីដែលគេរំពឹងទុក គេក៏បោះបង់អ្នក ឬក្លាយជាសត្រូវរបស់អ្នកមួយរំពេច។ សម្រាប់អ្នករកស៊ីដែលអ្នកគប្បីយកជាគ្នានោះ គឺអ្នកដែលគិតប្រយោជន៍រួមជាងប្រយោជន៍ខ្លួនឯង។ ការសហការគ្នាក្នុងការរកស៊ី វារមែងមានខាតមានចំណេញ។ បើយើងប្រឹងអស់លទ្ធភាពហើយនៅតែខាត នោះយើងក៏ទទួលយកទៅ ហើយប្រឹងគិតរកមើលច្រករកស៊ីថ្មីៗផ្សេងទៀតដែលយើងអាចធ្វើជាមួយគ្នាបាន។ ការរកស៊ីខាត វាជារឿងរបស់អាជីវកម្ម តែយើងគប្បីរក្សាទំនាក់ទំនងមិត្តភាព និងបងប្អូនឱ្យនៅដដែល។ បើចួបមនុស្សដែលឱ្យតម្លៃប្រាក់ចំណេញលើសពីតម្លៃមិត្តភាព និងបងប្អូនហើយនោះ ចូរអ្នកកុំសហការរកស៊ីជាមួយគាត់ឱ្យសោះ។

៣. មនុស្សដែលកំពុងលង់ខ្លួនក្នុងរឿងអបាយមុខ

កុំសហការរកស៊ីជាមួយមនុស្សញៀនល្បែង ញៀនស្រី-ប្រុស ញៀនស្រា និងថ្នាំញៀនផ្សេងៗឱ្យសោះ។ មិនថាគេមានចំណេះដឹង និងបទពិសោធលើការរកស៊ីច្រើនប៉ុនណាទេ គេអាចនឹងធ្វើឱ្យការរកស៊ីរបស់អ្នក និងគេរលំរលាយមួយរំពេច។ ពាក្យចាស់លោកថា “ទៀងមិនឈ្នះទ័ល។” បើស៊យចំថ្ងៃណាគាត់ចាញ់ល្បែងជំពាក់គេច្រើន នោះគាត់អាចនឹងប្រមូលលុយក្រុមហ៊ុនរត់បាត់ ឬយកទ្រព្យសម្បត្តិផ្សេងៗរបស់ក្រុមហ៊ុនទៅទូទាត់សងបំណុលបនល្បែងទៀតផង។ រឿងមួយទៀត មនុស្សញៀនញ៉ាមនឹងមនុស្សប្រុស ឬមនុស្សស្រី ក៏មិនត្រូវរកស៊ីជាមួយដែរ។ ជាពិសេសមនុស្សដែលមានគ្រួសារហើយ ហើយលួចមានស្រី ឬប្រុសខាងក្រៅ។ មនុស្សបែបនេះ គេហៅថាមនុស្សគ្មានសុចរិតភាព។ មនុស្សប្រភេទនេះ ម្យ៉ាងច្រើនតែចួបរឿងមួម៉ៅក្តៅក្រហាយក្នុងគ្រួសារ ហើយនាំរឿងចង្រៃនោះមកចូលឡូកឡំក្នុងក្រុមហ៊ុន ហើយម្យ៉ាងទៀត គាត់ក៏អាចនឹងក្បត់យើងដើម្បីកាមតណ្ហារបស់ខ្លួនផងដែរ។ បើចំពោះមនុស្សប្រើប្រាស់ថ្នាំញៀនវិញ មិនចាំបាច់បរិយាយច្រើនទេ គឺកុំយកខ្លួនបៀតសហការរកស៊ីតែម្តង៕

____________________

ស្មេរដោយ : ឧកញ៉ា ជា តុងហ៊ួរ

Credit Source: https://t.me/cheatonghourcth/614