🎯 ចង់ក្លាយជាសហគ្រិន អ្នកចាំបាច់ត្រូវមាន ៣ ចំណុចនេះ

 នាពេលបច្ចុប្បន្ន ពាក្យថា “សហគ្រិន” កំពុងតែមានប្រជាប្រិយភាពយ៉ាងខ្លាំង។ ពាក្យនេះបានឆក់ចិត្តឆក់បេះដូងយុវជនជាច្រើនឱ្យកម្រើកឡើងចង់ក្លាយខ្លួនជាមនុស្សម្នាក់ដែលគេហៅថា សហគ្រិន។ ប្រសិនបើលោកអ្នកមានចំណាប់អារម្មណ៍ ឬមានគោលដៅចង់ក្លាយជាសហគ្រិនមែននោះ ជាបន្តទៅនេះសូមជូនគំនិតសំខាន់ៗចំនួន ៣ ជាមូលដ្ឋានគ្រឹះដ៏សំខាន់ដែលសហគ្រិនគ្រប់រូបមិនអាចខ្វះបាន។ 

🌱 ១. ការអត់ធ្មត់ព្យាយាម

នៅក្នុងការរកស៊ី គ្មានអាជីវកម្មណាអាចជោគជ័យក្នុងរយៈពេលមួយយប់នោះទេ។ សម្រាប់អ្នកធ្វើអាជីវកម្ម ភាពអំណត់អត់ធ្មត់ គឺជារឿងសំខាន់បំផុតមិនអាចខ្វះបាន។ បើគ្មានភាពអំណត់ទេ ការចង់របស់អ្នកគឺគ្រាន់តែជាភ្លើងចំបើងមួយឈុលប៉ុននោះ។ ការអត់ធ្មត់ នឹងផ្តល់លទ្ធផលធំដុំ គឺវាប្រៀបបានដូចជាដើមឈើធំដែលត្រូវការរយៈពេលវែងដើម្បីបានខ្លឹមដ៏មានតម្លៃ។ ការចេញរកស៊ីដោយខ្លួនឯង អ្នកត្រូវចួបព្យុះចួបភ្លៀងច្រើនណាស់ ហើយការឆ្លងកាត់ព្យុះភ្លៀងទាំងនោះក៏មិនប្រាដកថាអ្នកនឹងជោគជ័យទេ។ នៅពេលអ្នកក្លាយជាម្ចាស់អាជីវកម្មមួយ អ្នកនឹងត្រូវស្ពាយទំនួលខុសត្រូវច្រើនណាស់។ មួយថ្ងៃៗ អ្នកត្រូវចួបបញ្ហាដែលត្រូវដោះស្រាយជាច្រើន។ ដើម្បីដោះស្រាយបញ្ហាទាំងនោះបាន អ្នកត្រូវតែមានភាពអត់ធ្មត់ខ្លាំងបំផុត។ ដូច្នេះ បើគិតចង់ធ្វើជាសហគ្រិននាពេលខាងមុខ សូមបណ្តុះភាពអត់ធ្មត់ជាបណ្តើរៗឱ្យហើយ។ 

🪴 ២. ការពុះពារឈ្មុសឈ្មុលទៅមុខ

សហគ្រិនម្នាក់ ទម្រាំតែគាត់ទទួលបានជោគជ័យលើរឿងអ្វីមួយ ច្បាស់ជាត្រូវឆ្លងកាត់បរាជ័យរឿងផ្សេងៗជាច្រើន។ ប៉ុន្តែ អ្វីដែលកំណត់មនុស្សជោគជ័យថាខុសពីមនុស្សបរាជ័យនោះ គឺនៅត្រង់ការខិតខំបន្តមិនព្រមបោះបង់។ អ្វីដែលខ្លួនបានសម្រេចចិត្ត និងកំណត់ថាចង់បានហើយ គាត់នឹងពុះពារឈ្មុសឈ្មុលយកឱ្យបាន។ ពេលវិធីសាស្រ្តមួយមិនជោគជ័យ គាត់នឹងស្វែងរកវិធីសាស្រ្តមួយផ្សេងទៀត។ គាត់ផ្លាស់ប្តូរវិធីសាស្រ្ត តែមិនផ្លាស់ប្តូរគោលដៅរបស់ខ្លួននោះឡើយ។ បើគោលដៅគឺទីក្រុងភ្នំពេញ (ឧបមាថាពេលនេះអ្នកនៅប៉ោយប៉ែត) ប្រសិនណាផ្លូវទៅតាមខេត្តពោធិ៍សាត់ដាច់មិនអាចទៅបាន អ្នកត្រូវទៅតាមផ្លូវកាត់ខេត្តសៀមរាប។ នេះហើយជាទស្សនៈរបស់សហគ្រិនជោគជ័យ។ បើជិះឡានមិនអាចទៅបាន អ្នកត្រូវតែរកមធ្យោបាយផ្សេងទៀត ទោះបីជាជិះរទេះ ឬរទេះគោ ក៏ត្រូវតែទៅឱ្យដល់គោលដៅ។ 

⚡️៣. ជំនក់ចិត្ត

គ្រប់សហគ្រិនចំណានៗនៅលើពិភពលោក សុទ្ធតែសម្រេចបានសមិទ្ធផលធំៗដោយសារជំនក់ចិត្ត។ ដូចយើងបានដឹងស្រាប់ហើយ នៅពេលដែលយើងជក់ចិត្ត ឬជាប់ចិត្តធ្វើរឿងអ្វីមួយ យើងនឹងធ្វើវាដោយមិនខ្លាចនឿយហត់ មិនខ្លាចក្តៅ មិនខ្លាចរងារ គឺធ្វើពេលខ្លះរហូតដល់ភ្លេចបាយភ្លេចទឹក។ តួយ៉ាង លោកប៊ីល ហ្កេតស៍ ជក់ចិត្តនឹងកម្មវិធីកុំព្យូទ័រ, លោកវឺរិន ប៊ឺហ្វេត ជក់ចិត្តនឹងការវិនិយោគ, លោកអេឡុន ម៉ាស ជក់ចិត្តនឹងភពអង្គារជាដើម។ ប្រសិនបើអ្នកចង់ជោគជ័យលើរឿងអ្វីមួយដែលមិនមែនជាជំនក់ចិត្តរបស់អ្នកទេ នោះវាពិតជាពិបាកណាស់។ ពេលខ្លះ ឃើញគេជោគជ័យលើរឿងរកស៊ីផ្នែកអចលនទ្រព្យ យើងក៏ហក់ទៅរកស៊ីនឹងគេ។ ដល់ពេលធ្វើបានបន្តិច មិនទទួលផលដូចចិត្តចង់បាន ក៏ចាប់ផ្តើមធុញទ្រាន់ ហើយក៏បោះបង់តែម្តង។ ការដឹងច្បាស់ថាខ្លួនចូលចិត្តអ្វី និងចង់បានអ្វី គឺជាការស្គាល់ខ្លួនឯងដែលជំរុញឱ្យយើងធ្វើការងាររហូតសម្រេចគោលដៅ៕

_____________________________

ស្មេរដោយ : https://t.me/cheatonghourcth

Credit Source: https://t.me/cheatonghourcth/583