🎯 សញ្ញា ៥ យ៉ាង បង្ហាញថាអ្នកកំពុងរីកចម្រើនទៅមុខ

 តើលោកអ្នកកំពុងតែមានចម្ងល់ថា តើខ្លួនឯងពេលនេះកំពុងតែដើរទៅមុខ ឬក៏កំពុងតែដើរថយក្រោយមែនទេ? ពិតណាស់ ពេលខ្លះយើងខ្លួនឯង នៅតែយល់មិនច្បាស់ចំពោះរឿងនេះ។ យ៉ាងណាមិញ សូមកុំបារម្ភ ជាបន្តទៅនេះ លោកអ្នកនឹងបានជ្រាបពីតម្រុយចំនួន ៥ យ៉ាង ដែលអាចបញ្ជាក់បានថា តើយើងកំពុងតែរីកលូតលាស់ទៅមុខ ឬក៏យ៉ាងណា។ តុះ! កុំឱ្យខាតពេលយូរ សូមអញ្ជើញលោកអ្នកតាមដានទាំអស់គ្នាដូចតទៅ។ 

១. អ្នកនៅពេលនេះ ខុសពីអ្នកនៅឆ្នាំមុន

ខុសនៅត្រង់នេះ គឺចង់សំដៅថាយើងរីកចម្រើនលូតលាស់ខុសពីមុន។ ដើម្បីចង់ដឹងថា តើយើងពិតជាកំពុងដើរលើផ្លូវត្រឹមត្រូវដែលនាំឱ្យខ្លួនឯងរីកលូតលាស់ទៅមុខ ឬយ៉ាងណា យើងចាំបាច់ត្រូវផ្ទៀងផ្ទាត់មើលថា តើយើងកាលពីមួយឆ្នាំមុន ឬបីឆ្នាំមុន ហើយនឹងយើងនៅពេលនេះ មានភាពខុសគ្នាយ៉ាងណា។ តើយើងមានសុខភាពប្រសើរជាងមុន ឬទ្រុឌទ្រោមជាងមុន, តើយើងមានទ្រព្យសម្បត្តិច្រើនជាងមុន ឬយើងមានបំណុលច្រើនជាងមុន, តើយើងស្គាល់មនុស្សល្អៗច្រើនជាងមុន ឬក៏មានពួកម៉ាកពួកភឿនជាមនុស្សយ៉ាប់ច្រើនជាងមុន, និងតើយើងមានចំណេះដឹង និងជំនាញច្រើនជាងមុន ឬក៏ចេះតែរេចរិលជាងមុន។ បើឃើញថាខ្លួនឯងមានការវិវឌ្ឍទៅមុខប្រសើរហើយ ក៏សូមបន្តធ្វើដំណើរលើវិថីហ្នឹងបន្តទៀតចុះ តែបើឃើញថាខ្លួនឯងដើរខុសផ្លូវ សូមភ្ញាក់រឭកឡើងវិញ ហើយកែប្រែខ្លួនឱ្យមកដើរលើផ្លូវត្រឹមត្រូវឆ្ពោះទៅរកការរីកចម្រើន។ 

២. អ្នកឆ្លងកាត់ការលំបាកសន្ធឹកសន្ធាប់ តែមិនព្រមចុះចាញ់

នេះគឺជាសញ្ញាដ៏ច្បាស់លាស់មួយដែលបង្ហាញថាអ្នកកំពុងតែរីកលូតលាស់ទៅមុខ។ មនុស្សដែលគ្មានការតស៊ូ គឺជាមនុស្សដែលមិនរីកចម្រើន។ ដូចបានធ្លាប់ជម្រាបលោកអ្នកហើយថា ឈើដែលមិនលាស់ត្រួយថ្មី ជាសញ្ញានៃការស្លាប់។ ការតស៊ូប្រឹងប្រែងនៅក្នុងការបំពេញការងារ ពេលខ្លះថ្វីបើមិនសូវបានលទ្ធផលជាដុំកំភួនអី តែយ៉ាងហោចណាស់ វាធ្វើឱ្យយើងក្លាយជាមនុស្សកាន់តែរឹងមាំ ដែលភាពរឹងមាំនេះហើយ នាំឱ្យយើងយកជ័យជំនះលើឧបសគ្គនានានៅថ្ងៃអនាគត។ យើងគ្រប់គ្នា តើនរណាទៅដែលមិនដឹង ដើម្បីសម្រេចគោលដៅរបស់ខ្លួន គឺសុទ្ធតែត្រូវឆ្លងកាត់ការលំបាក? យើងសុទ្ធតែដឹង តើមែនទេ? បើជោគជ័យកើតឡើងងាយៗដោយមិនបាច់ប្រឹងប្រែង អ៊ីចឹងមនុស្សគ្រប់គ្នាច្បាស់គ្មាននរណាបរាជ័យនោះឡើយ។ ហើយបើជោគជ័យកើតឡើងងាយៗដូច្នេះ នោះភាពជោគជ័យក៏លែងមានសារសំខាន់អ្វីទៀតដែរ។ ដូច្នេះ ចូរកុំតូចចិត្តប្រសិនបើយើងកំពុងតស៊ូដែរ តែមិនទាន់ទទួលបានលទ្ធផលដូចការរំពឹងទុក។ ការណ៍ដែលយើងមិនទាន់ទទួលបានផលនេះ គឺមិនមែនមានន័យថាយើងបរាជ័យទេ តែវាបង្ហាញថា យើងតស៊ូប្រឹងប្រែងមិនទាន់ដល់កម្រិត។ ម៉្លោះហើយ សូមកុំអស់សង្ឃឹម ហើយចូរព្យាយាមពុះពារបន្តដំណើរទៅមុខទៀត។ 

៣. អ្នកបន្តរៀបចំ និងអនុវត្តន៍ផែនការរបស់ខ្លួនជានិច្ច

ការណ៍ដែលយើងមិនបោះបង់ផែនការ និងសកម្មភាពដែលខ្លួនបានគិតរៀបចំនោះ គឺជាសញ្ញាបញ្ជាក់ថា យើងដើរលើម៌ាគាត្រូវហើយ។ ការណ៍ដែលគ្រាន់តែចេះរៀបចំផែនការ មនុស្សជាច្រើនសុទ្ធតែអាចធ្វើបាន ប៉ុន្តែមានមនុស្សតិចណាស់ដែលអាចពុះពារធ្វើឱ្យផែនការទាំងនោះសម្រេចបានជោគជ័យ។ ដូច្នេះ សូមកុំអាលគិតថាខ្លួនឯងអស្ចារ្យ បើកាលណាអ្នកគ្រាន់តែមានផែនការនៅលើក្រដាសនោះ។ តែត្រូវរង់ចាំដល់ពេលផែនការនោះក្លាយជាលទ្ធផលដូចការចង់បានសិន សឹមបង្ហាញស្នាដៃឱ្យអ្នកដទៃឃើញ។ នៅពេលនេះ សាកសម្លឹងមើលមកខ្លួនឯងទៅមើល៍ តើខ្លួនកំពុងតែអនុវត្តន៍ផែនការ ឬក៏បានបោះបង់ផែនការរបស់ខ្លួនចោលអស់ទៅហើយ។ ចូរអ្នកចងចាំថា ការបោះបង់ផែនការរបស់ខ្លួន គឺជាបទពិសោធរបស់មនុស្សបរាជ័យ។ មនសុ្សបរាជ័យ តែងតែបោះបង់កិច្ចការរបស់ខ្លួននៅកណ្តាលទី។ 

៤. អ្នកមានសុទិដ្ឋិនិយមជានិច្ចចំពោះកិច្ចការដែលខ្លួនធ្វើ

នៅពេលដែលយើងមានអារម្មណ៍ និងមានក្តីសង្ឃឹមជាប់ជានិច្ចជាមួយនឹងអ្វីដែលយើងកំពុងធ្វើ នោះមានន័យថាយើងកំពុងរីកលូតលាស់ទៅមុខហើយ។ ផ្ទុយទៅវិញ បើយើងមានអារម្មណ៍មួម៉ៅមិនពេញចិត្តនឹងកិច្ចការរបស់ខ្លួនឯងទេ នោះបង្ហាញថាយើងកំពុងមានបញ្ហាហើយ។ អារម្មណ៍បែបនេះ ហាក់ដូចជាច្រែសដែលកំពុងស៊ីដែកដូច្នេះដែរ។ បើមិនព្រមភ្ញាក់រឭកកែប្រែទេ នោះគំនិតអវិជ្ជមានដែលដក់ជាប់ក្នុងខួរក្បាលយើង នឹងបំផ្លាញយើងបន្តិចម្តងៗរហូតដល់យើងបកក្រោយលែងបាន។ ភាពសុទិដ្ឋិនិយមចំពោះកិច្ចការ គឺរឿងសំខាន់បំផុត។ បើយើងគិតបែបណា ជីវិតរបស់យើងនឹងក្លាយទៅជាបែបនោះ។ ដូច្នេះ សូមគិតរឿងល្អៗ និងមានសុទិដ្ឋិនិយមឱ្យបានច្រើនចំពោះខ្លួនឯង និងចំពោះកិច្ចការរបស់យើង។ 

៥. អ្នកបន្តជំរុញខ្លួនឯងឱ្យដើរទៅមុខជានិច្ច

ការបន្តលើកទឹកចិត្ត និងជំរុញខ្លួនឯងឱ្យខិតខំព្យាយាមជាប់ជានិច្ច គឺជាសញ្ញាបញ្ជាក់យ៉ាងច្បាស់ក្រឡែតថាយើងជាមនុស្សដែលកំពុងចេញផ្លែផ្កា។ ខណៈដែលអ្វីៗគ្រប់យ៉ាងនៅជុំវិញយើង មិនថាពេលវេលា រដូវកាល បច្ចេកវិទ្យា ចំណេះដឹង និងមនុស្ស ចេះតែវិវឌ្ឍទៅមុខ បើយើងនៅឈរមួយកន្លែង នោះយើងមិនខុសអីពីមនុស្សស្លាប់ទាំងរស់នោះឡើយ។ ដូច្នេះ ទោះបីស្ថិតក្នុងកាលៈទេសៈលំបាកលំបិនយ៉ាងណាក៏ដោយ យើងត្រូវចេះផ្តល់កម្លាំងចិត្តដល់ខ្លួនឯងជាប់ជានិច្ច៕

_______

Credit Source: https://t.me/cheatonghourcth/634

ស្មេរដោយ : https://t.me/cheatonghourcth