🎯 កត្តា ៤ យ៉ាង ដែលកំណត់ថាអ្នកនឹងក្លាយទៅជាអ្វីនៅ ១០ ឆ្នាំក្រោយ

 តើអ្នកអាចស្រមៃឃើញទេ ថានៅរយៈពេល១០ឆ្នាំក្រោយ អ្នកនឹងក្លាយទៅជាអ្វី ឬមានអនាគតបែបណា? មែនហើយ ថ្វីបើយើងមិនអាចទាយដឹងពីអនាគតបាន ប៉ុន្តែយើងអាចកំណត់វាតាមរយៈអ្វីៗដែលយើងធ្វើនាពេលបច្ចុប្បន្ន។ ជាបន្តទៅនេះ គឺជាកត្តា ៤ យ៉ាង ដែលអាចកំណត់បានថា តើអ្នកនឹងក្លាយទៅជាបែបណានៅរយៈពេល ១០ ឆ្នាំក្រោយ។ 

📚 ១. សៀវភៅដែលអ្នកអាន

ការអានសៀវភៅ គឺជាការផ្តល់ចំណីអាហារឱ្យខួរក្បាល។ ប្រសិនបើអ្នកអានសៀវភៅត្រូវ(សៀវភៅល្អ) នោះខួរក្បាលអ្នកក៏នឹងមានកម្លាំងពលំ តែបើអ្នកចេះតែអានសៀវភៅប៉ាតណាប៉ាណីមិនចេះប្រុងប្រយ័ត្ន នោះខួរក្បាលអ្នកនឹងទទួលបានតែអាហារជូរផ្អូមដែលធ្វើឱ្យក្បាលក្លាយទៅជាធុងសំរាមដាក់របស់ស្អុយរលួយតែប៉ុននោះ។ ការអានសៀវភៅខុស មិនត្រឹមតែធ្វើឱ្យអ្នកទទួលទិន្នន័យខុសទេ សំខាន់វាធ្វើឱ្យបង់ខាតពេលវេលាសម្បើមណាស់។ ដូច្នេះជំហានដំបូង គឺត្រូវបណ្តុះទម្លាប់អានសៀវភៅឱ្យបាន ហើយបន្ទាប់មក អ្នកត្រូវតែជ្រើសរើសសៀវភៅអានឱ្យត្រូវ។ ការរើសសៀវភៅអានឱ្យត្រូវ គឺចាំបាច់ត្រូវរើសសៀវភៅដោយមើលទៅលើជំនាញ មើលលើគ្រឹះស្ថានបោះផ្សាយ និងមើលលើអ្នកនិពន្ធ អ្នករៀបរៀង ឬអ្នកបកប្រែ។ ការអានសៀវភៅឱ្យបានទៀងទាត់ក្នុងរយៈពេល ១០ ឆ្នាំ នោះអ្នកនឹងក្លាយទៅជាមនុស្សថ្មីអស្ចារ្យម្នាក់។ 

🤼 ២. មនុស្សដែលអ្នកសេពគប់

ការសេពគប់មនុស្ស គឺកត្តាកំណត់ពីអនាគតរបស់អ្នកដ៏សំខាន់មួយ។ សុភាសិតមួយគេនិយាយថា Tell me about your friend, and I will know who you are ឬមានន័យថា ចូរប្រាប់ខ្ញុំអំពីមិត្តរបស់អ្នក នោះខ្ញុំនឹងអាចដឹងបានថា តើអ្នកជាមនុស្សយ៉ាងម៉ែច។ ការសេពគប់ វាមានឥទ្ធិពលខ្លាំងហួសពីការស្មានរបស់យើង ដូច្នេះចូរកុំប្រមាថឱ្យសោះ។ ផ្សែងភ្លើងដែលចេញពីចង្រ្កាន្តរាល់ថ្ងៃ វានឹងធ្វើឱ្យដំបូលផ្ទះប្រែជាខ្មៅដោយចុងភៅមិនបានចាប់អារម្មណ៍។ ប្រសិនបើអ្នកចង់ក្លាយជាមនុស្សចេះដឹង អ្នកត្រូវតែសេពគប់មនុស្សចេះដឹង។ ប្រសិនបើអ្នកចង់ក្លាយជាអ្នកមាន អ្នកត្រូវតែសេពគប់អ្នកមាន។ សុភាសិតដ៏ល្អមួយទៀត គេនិយាយថា បើអ្នកដើរជាមួយតោចំនួន៥ នោះអ្នកនឹងក្លាយទៅជាតោទី៦។ បើអ្នកសេពគប់បណ្ឌិតចំនួន៥នាក់ នោះអ្នកនឹងក្លាយជាទៅជាបណ្ឌិតទី៦។ 

⛳️ ៣. ទម្លាប់ដែលអ្នកបណ្តុះរាល់ថ្ងៃ

ចូរសង្កេតមើលខ្លួនឯង តើអ្នកមានទម្លាប់ដែលនាំឱ្យមានការរីកចម្រើន និងមានអនាគតប្រសើរដែរ ឬទេ? តើអ្នកមានទម្លាប់អានសៀវភៅ អានព័ត៌មាន ស្រាវជ្រាវ ជជែករឿងការងារ និងការរកស៊ីជាមិត្តភក្តិ ហាត់ប្រាណ សមាធិ ឬបង្កភាពរីករាយនៅក្នុងផ្ទះដែរ ឬទេ? ឬក៏អ្នកកំពុងតែបណ្តុះទម្លាប់ដេកស្ពឹក អែអង់ចំពោះការងារ ញៀននឹងការលេងហ្គេម ខ្ជិលច្រអូស និយាយកុហក មិនរៀបចំផែនការសកម្មភាពប្រចាំថ្ងៃ មានគំនិតអវិជ្ជមានច្រើន ឬម្ងៃៗនិយាយតែដើមអ្នកដទៃ? ទម្លាប់ប្រចាំថ្ងៃរបស់អ្នក នឹងក្លាយទៅជាវប្បធម៌របស់អ្នក ហើយវប្បធម៌របស់អ្នកនឹងកំណត់វាសនាជីវិតរបស់អ្នក។ បើអ្នកមានទម្លាប់អាក្រក់ នោះអ្នកនឹងមានវប្បធម៌អាក្រក់ ហើយទីបំផុតអ្នកកុំសង្ឃឹមថានឹងមានអនាគតល្អឱ្យសោះ។ ដូច្នេះ បើអ្នកមានទម្លាប់ល្អហើយ សូមបន្តធ្វើទៀតចុះ តែបើមិនទាន់មានទេ ចូរបណ្តុះទម្លាប់ល្អៗឱ្យបានច្រើន ដើម្បី ១០ ឆ្នាំក្រោយ អ្នកនឹងមានអនាគតដ៏អស្ចារ្យមួយ។ 

🥬🍖៤. អាហារដែលអ្នកញ៉ាំ

ភាសាអង់គ្លេស មានសុភាសិតមួយគឺ You are what you eat ឬមានន័យថា បើញ៉ាំអាហារបែបណា សុខភាពយើងនឹងក្លាយជាបែបនោះដែរ។ ប្រសិនបើអ្នកញ៉ាំអាហារមិនល្អ សុខភាពអ្នកនឹងមិនល្អទៅតាមនោះ។ ដូចបានជ្រាបកាលពីវីដេអូមុនមកហើយថា សុខភាពគឺជារបស់ដែលយើងត្រូវប្រយ័ត្នបំផុតកុំវាបាត់បង់ទៅដោយងាយៗឱ្យសោះ។ កាលណាអ្នកញ៉ាំអាហារមិនល្អ ឬទទួលទានគ្រឿងស្រវឹងច្រើនហួសហេតុនាពេលបច្ចុប្បន្ននេះ នោះក្នុងរយៈពេល ១០ ឆ្នាំក្រោយ អ្នកនឹងក្លាយទៅជាអ្នកជម្ងឺម្នាក់។ ពេលនោះ លុយដែលអ្នកប្រឹងរកបានទាំងប៉ុន្មាន នឹងត្រូវចាយដើម្បីតែព្យាបាលជម្ងឺ ចំណេះដឹងដែលអានពីសៀវភៅទាំងប៉ុន្មាន នឹងមិនត្រូវបានយកប្រើ ហើយទម្លាប់ល្អៗដែលអ្នកប្រឹងបណ្តុះក៏មិនអាចហុចផលឱ្យអ្នកបានទេ។ ម៉្លោះហើយ ចូរស្រឡាញ់សុខភាពអ្នកឱ្យស្មើនឹងជីវិតអ្នក៕

________________________________

ស្មេរដោយ: https://t.me/cheatonghourcth

Credit Source: https://t.me/cheatonghourcth/573