💎 ៤ យ៉ាងដែលយើងត្រូវផ្លាស់ប្តូរដើម្បីជីវិតរីកចម្រើន

 នៅក្នុងខ្លួនយើងគ្រប់គ្នា មានទាំងធាតុវិជ្ជមាន និងធាតុអវិជ្ជមាន។ វាខុសគ្នានៅត្រង់ថា អ្នកខ្លះមានធាតុអវិជ្ជមានច្រើន ហើយអ្នកខ្លះមានតិចតែប៉ុននោះ។ មនុស្សដែលមានធាតុអវិជ្ជមានច្រើន ឬធាតុអាក្រក់ច្រើន គឺច្រើនតែរស់នៅមិនសមប្រកបសេចក្តីសុខចម្រុងចម្រើនឡើយ។ គេតែងតែជួបបញ្ហារកាំរកូសក្នុងជីវិតមិនចេះចប់មិនចេះហើយប្រៀបបីដូចជាមនុស្សមានដំបៅដើរចូលព្រៃ។ ជាបន្ត សូមប្រិយមិត្តទៅមើលរបស់ ៤យ៉ាង ដែលអ្នកចាំបាច់ត្រូវផ្លាស់ប្តូរជម្រះចេញបើចង់ឱ្យជីវិតរីកលូតលាស់ល្អប្រសើរទៅមុខ។ 

🎯១. ផ្លាស់ប្តូរភាពខ្ជិលច្រអូស

ភាពខ្ជិលច្រអូស វាតោងជាប់ខ្លួនយើង និងមនុស្សគ្រប់គ្នាតាំងពីកំណើត។ នេះមានន័យថានរណាក៏មានភាពខ្ជិលក្នុងខ្លួនដែរ គ្រាន់តែអ្នកខ្លះខ្ជិលតិច និងអ្នកខ្លះខ្ជិលច្រើន។ អ្នកខ្ជិលតិច ពីព្រោះគេព្យាយាមកាត់ជម្រះភាពខ្ជិលរបស់ខ្លួនបន្តិចម្តងៗយ៉ាងទៀតទាត់រហូតបង្កើតបានភាពឧស្សាហ៍ឡើងមក។ រីឯមនុស្សមានភាពខ្ជិលច្រើន ដោយសារគេបណ្តោយខ្លួនរស់នៅក្នុងទម្លាប់ខ្ជិលច្រអូស ដែលធ្វើឱ្យភាពខ្ជិលនេះចាក់ឫសយ៉ាងជ្រៅនៅក្នុងចិត្តគំនិតរបស់គេ។ ភាពខ្ជិល គឺជាហេតុដែលនាំឱ្យកើតមានបញ្ហាធំៗនៅក្នុងជីវិតយើង តួយ៉ាង ខ្ជិលនាំឱ្យក្រ ខ្ជិលនាំឱ្យអ្នកដទៃមើលងាយមិនឱ្យតម្លៃ ខ្ជិលនាំឱ្យល្ងង់ ខ្ជិលនាំឱ្យបរាជ័យ។ល។ ប្រសិនបើអ្នកមិនចង់ចួបប្រសព្វភ័យន្តរាយធំៗក្នុងជីវិតទេ អ្នកត្រូវតែផ្លាស់ប្តូរភាពខ្ជិលច្រអូសទៅភាពឧស្សាហ៍ព្យាយាមដោយឧស្សាហ៍រៀនសូត្រ ឧស្សាហ៍ធ្វើការ ឧស្សាហ៍ជួយការងារអ្នកដទៃ ឧស្សាហ៍រកស៊ីជួញដូរជាដើម។ ភាពឧស្សាហ៍លេចពន្លកនៅទីណា ផលផ្លែផ្កាឧត្តមប្រសើរនឹងដុះនៅទីនោះ។ 

🎯២. ផ្លាស់ប្តូរការភ័យខ្លាច

ភាពភ័យខ្លាច ក៏ជាអ្វីដែលជាប់ដិតដាមក្នុងផ្នត់គំនិតរបស់មនុស្សយើងគ្រប់គ្នាដែរ។ គ្រាន់តែថា បើយើងមិនព្យាយាមលុបបំបាត់វាទេ វាមិនត្រឹមតែមិនផ្តល់ផលប្រយោជន៍អ្វីដល់យើង តែវាថែមទាំងនាំទុក្ខអន្តរាយនានាមកឱ្យយើងទៀតផង។ ទម្លាប់ភ័យខ្លាច វាអាចកើតឡើងបន្តិចម្តងៗជាប្រចាំដោយយើងមិនដឹងខ្លួន ឬពេលខ្លះវាកើតឡើងធ្វើឱ្យយើងបាក់ស្បាតដោយសារជួបហេតុការណ៍អ្វីមួយ។ ឧទាហរណ៍ អ្នកខ្លះធ្លាប់ធ្វើការជាមួយមេដែលកោងកាចសម្លុតគំរាមកំហែងរហូតធ្វើឱ្យពួកគេក្លាយជាបុគ្គលិកខ្លបខ្លាចបាក់ស្បាត ហើយភាពភ័យខ្លាចនេះចេះតែបន្តដុះរីកក្នុងចិត្តគំនិតរបស់គេឥតឈប់ឈរ។ ថ្វីបើវាដុះលូតលាស់គ្រប់ពេលយ៉ាងណា យើងក៏មិនត្រូវបណ្តែតបណ្តោយឱ្យភាពភ័យខ្លាចនេះមកគ្របសង្គត់ជីវិតរបស់យើងឡើយ។ យើងត្រូវដាក់ចិត្តដាក់កាយប្តេជ្ញាពង្រឹងខ្លួនឯងឱ្យក្លាយជាមនុស្សក្លាហាន រឹងមាំ មានគោលជំហរខ្លួនឯង ហ៊ានស៊ីហ៊ានសង និងហ៊ានទទួលខុសត្រូវរាល់ទង្វើរបស់ខ្លួន។ 

🎯៣. ផ្លាស់ប្តូរគំនិតអវិជ្ជមាន

មនុស្សដែលមានគំនិតអវិជ្ជមានច្រើន ជាមនុស្សមុជមិនជ្រៅទៅមិនឆ្ងាយ។ បើរវល់តែធ្វើនេះខ្លាចខុស ធ្វើនោះខ្លាចខូច តើឱ្យគេសម្រេចកិច្ចការធំៗម៉េចនឹងបាន? ប្រសិនបើយើងជាមនុស្សមានផ្នត់គំនិតអវិជ្ជមាន ឬទុទិដ្ឋិនិយមទៅហើយ គ្មាននរណាឡើយចង់នៅក្បែរយើងនោះទេ។ គេមិនចង់គំនិតអវិជ្ជមានរបស់យើងក្លាយជាមេរោគរារាំងដំណើរជីវិតឆ្ពោះទៅរកការរីកចម្រើនរបស់គេ។ យើងគ្រប់គ្នាប្រហែលជាបានដឹងរួចមកហើយថា មនុស្សយើងមានចិត្តគំនិតជាប្រធាន។ យើងគិតបែបណា យើងនឹងធ្វើបែបនោះ។ យើងធ្វើបែបណា យើងនឹងទទួលផលបែបនោះ ហើយផលល្អ ឬអាក្រក់ វាអាស្រ័យទៅលើគំនិតជាដើមចមហ្នឹងឯង។ ចូរសួរខ្លួនឯងទៅមើល៍ បើយើងមានគំនិតអវិជ្ជមានចំពោះអ្នកមាន តើយើងអាចក្លាយជាអ្នកមានដោយរបៀបណា? បើយើងមានគំនិតអវិជ្ជមានចំពោះអ្នកចេះដឹង តើយើងអាចក្លាយជាអ្នកចេះដឹងដោយរបៀបណា? ដូច្នេះ សូមបើកចិត្តឱ្យទូលាយ ហើយផ្លាស់ប្តូរគំនិតអវិជ្ជមានមកជាវិជ្ជមាន។ ចូរដោះវ៉ែនតាខ្មៅចេញ ហើយសម្លឹងមើលពិភពលោកដ៏ស្រស់បំព្រង នោះជីវិតយើងក៏នឹងរីករាយស្រស់ស្រាយទៅតាមនោះដែរ។ 

🎯៤. ផ្លាស់ប្តូរការខឹងស្អប់ច្រណែនឈ្នានីស

ការស្អប់ ការច្រណែន គឺមេរោគដ៏សាហាវដែលខាំស៊ីត្រួយជីវិតរបស់អ្នកមិនឱ្យរីកលូតលាស់។ ហេតុអ្វីត្រូវស្អប់គេ? ហេតុអ្វីត្រូវច្រណែនគេ? ស្អប់នរណាក៏ដោយ គឺសុទ្ធតែធ្វើឱ្យទ្រូងយើងក្តៅរោលរាល ហើយពេលខ្លះក្តៅឆាបឆួលតែម្នាក់ឯងដោយគ្មានអ្នកដឹង។ ច្រណែននរណាដ៏ដោយ គឺសុទ្ធតែធ្វើឱ្យខ្លួនឯងមួម៉ៅក្តៅក្រហាយ។ ការខឹង និងការច្រណែនឈ្នានីស រមែងនាំឱ្យកើតមានជម្លោះ និងបង្កទៅជាអំពើហិង្សាបង្កើតរបួសស្នាម និងបន្សល់ទុកនូវអតីតកាលដ៏ខ្មៅងងឹតនៅក្នុងជីវិតយើង។ ដូច្នេះ ចូរអ្នកផ្លាស់ប្តូរការខឹងស្អប់ទៅជាសេចក្តីស្រលាញ់ និងផ្លាស់ប្តូរការច្រណែនឈ្នានីសទៅជាទឹកចិត្តមេត្តាករុណា ហើយត្រេកអររីករាយជាមួយសេចក្តីសុខចម្រើនរបស់មនុស្សគ្រប់គ្នាជុំវិញខ្លួនយើង៕

____________________

ស្មេរដោយ : Chea Tong Hour

Credit Source: https://t.me/cheatonghourcth/559